Gürcüstanın baş nazirinin müavini, iqtisadiyyat və davamlı inkişaf naziri Levan Davitaşvili Azərbaycanın iqtisadiyyat naziri Mikayıl Cabarov ilə görüşüb.
QafqazTürk.com xəbər verir ki, bu barədə iqtisadiyyat və davamlı inkişaf nazirliyinin mətbuat xidməti məlumat yayıb.
Məlumata görə, görüşdə iqtisadiyyat və davamlı inkişaf nazirinin birinci müavini Romeo Mikautadze, nazir müavini Genadi Arveladze, Gürcüstanın Beynəlxalq Neft Korporasiyasının baş direktoru Giorgi Çikovani və Gürcüstanın Azərbaycandakı səfiri Zurab Pataradze iştirak ediblər.
Görüşdə tərəflər ikitərəfli ticari-iqtisadi əlaqələri müzakirə ediblər və iqtisadi əlaqələrin gücləndirilməsinin Gürcüstan və Azərbaycan arasında əməkdaşlığın dərinləşdirilməsinin mühüm aspekti olduğunu qeyd ediblər. Hər iki ölkənin qlobal və regional iqtisadi, enerji və nəqliyyat layihələrini uğurla həyata keçirdiyi vurğulanıb.
İkitərəfli ticarətin inkişafına xüsusi diqqət yetirilib. Bildirilib ki, Azərbaycan son illərdə Gürcüstanın ilk beş ticarət tərəfdaşı sırasındadır, 2022-ci ildə isə ölkənin əsas ixracatçı ölkələri arasında ikinci yerdədir. Bundan əlavə, ixrac potensialının böyük olduğu və Gürcüstanın Azərbaycana kənd təsərrüfatı məhsulları, ərzaq, azot gübrələri, sement və s. kimi məhsulların ixracının artırılmasında maraqlı olduğu vurğulanıb.
Gürcüstan tərəfi www.tradewithgeorgia.com haqqında məlumat verib və ümidvar olduğunu bildirib ki, Azərbaycanın işgüzar dairələri onun vasitəsilə ikitərəfli ticarət əlaqələrini daha da gücləndirə biləcəklər.
Görüşdə ölkələr arasında investisiya sahəsində əməkdaşlığa da toxunulub. Bildirilib ki, Gürcüstan azərbaycanlı investorlara turizm, enerji, aqrar-sənaye, logistika, informasiya texnologiyaları, sənaye və s. kimi sahələrdə layihələr təklif etməkdə maraqlıdır.
Nəqliyyat və enerji sektorlarında ikitərəfli və regional layihələrin inkişafına xüsusi diqqət yetirilib. Qeyd olunub ki, hər iki ölkə Gürcüstan və Azərbaycan ərazisindən keçən orta dəhlizin inkişaf etdirilməsində və yeni tranzit yüklərin cəlb olunmasında maraqlıdır. Söhbət zamanı Anakliya dərinsulu limanının tikintisinin gedişinə də toxunulub. Tərəflər həmçinin Bakı-Tbilisi-Qars dəmir yolunda mövcud vəziyyəti, o cümlədən Gürcüstan və Azərbaycan arasında əlavə reyslərin təyin edilməsi imkanlarını müzakirə ediblər.
Genişmiqyaslı layihənin – Qara dəniz sualtı kabel layihəsinin inkişafı məsələsi xüsusilə vurğulanıb. Onun Cənubi Qafqazın yaşıl enerji resurslarının Aİ bazarına çatdırılması üçün xüsusi əhəmiyyəti qeyd edilib.
İclasda Baş nazirin müavini Levan Davitaşvili mühüm regional platforma kimi Tbilisi İpək Yolu Forumuna diqqət çəkib və Azərbaycan nümayəndə heyətinin yüksək səviyyədə təmsil olunacağına və Baş Nazir Əli Əsədovun rəhbərlik edəcəyinə ümidvar olduğunu bildirib.
