Gürcüstanda işlənmiş avtomobil bazarı böhran yaşayır.
QafqazTürk.com xəbər verir ki, bunu Avtomobil İdxalçıları Assosiasiyasının sədri Aleksandr Noniadze deyib.
Onun sözlərinə görə, bu gün avtomobil alverçiləri əvvəlki illərlə müqayisədə daha çox dövriyyə kapitalına ehtiyac duyurlar, lakin bazardakı problemlər fonunda avtomobillər maya dəyərindən aşağı qiymətə satılır.
“2023-cü ilə qədər artıq təklif bazarın dözə biləcəyindən 60 min ədəd çox olub. Nəticədə bazarda böhran var və avtomobillər satılmır. Ən yaxşı seçim maya dəyərindən aşağı satmaqdır və heç bir mənfəət qalmayıb”, – deyə assosiyasiya sədri bildirib.
Avtomobil idxalçıları yayda vəziyyətin sabitləşəcəyini və avtomobillərin daha aktiv satılacağını, tələb və təklifin bərabərləşəcəyini ehtimal ediirlər.
Gürcüstanın Milli Statistika Xidməti “Sakstat”ın məlumatına görə, 2024-cü ilin yanvar-mart aylarında Gürcüstana 486,6 milyon dollar dəyərində avtomobil idxal edilib ki, bu da 2023-cü ilin üç ayı ilə müqayisədə 31,3% azdır.
