2024-cü il yanvarın 1-nə olan statistikaya görə, Gürcüstan əhalisinin sayı 3 milyon 694 min 600 nəfər təşkil edib ki, bu da ötən ilin müvafiq dövrünün göstəricisindən 1,1% azdır.
QafqazTürk.com xəbər verir ki, bu barədə Milli Statistika Xidməti məlumat yayıb.
Qeyd edək ki, 2023-cü ildə mənfi təbii artım (-2 min 542) və mənfi miqrasiya saldosu (-39 min 207) qeydə alınıb.
Bununla yanaşı, 2024-cü il yanvarın 1-nə olan göstəriciyə əsasən, Gürcüstan əhalisinin 61% i şəhər yaşayış məntəqələrində yaşayır. Bundan əlavə, paytaxt Tbilisi əhalisi ümumi əhalinin üçdə birindən çoxunu təşkil edir.
Eyni tarixə görə 0-14 yaşlı əhalinin bütün əhali tərkibində xüsusi çəkisi 19,5%, əmək qabiliyyətli əhalinin (15-64 yaş qrupu) xüsusi çəkisi 64,3%, yaşlı əhalinin xüsusi çəkisi 65% və daha yuxarı olanlar 16,2% təşkil edir.
2024-cü il yanvarın 1-nə kişilərin sayı 1774,5 min nəfər, qadınların sayı isə 1920,1 min nəfər olub. Bundan başqa, Gürcüstan əhalisinin 48%-ini kişilər, 52%-ini isə qadınlar təşkil edir. Cins nisbəti 92-dir, yəni hər 100 qadına 92 kişi düşür.
Qeyd edək ki, 40 yaşa qədər kişilərin sayı qadınların sayını üstələyir, 40 yaşdan sonra isə bunun əksi müşahidə olunur ki, bu da qadınların kişilərə nisbətən daha uzun ömür sürməsi ilə əlaqədardır.
Bundan başqa, 2023-cü ildə gözlənilən ömür uzunluğu əvvəlki illə müqayisədə 1,3 vahid artaraq 75%, o cümlədən kişilər üçün 70,6% qadınlar üçün 79,4 yaş təşkil edib.
2024-cü il yanvarın 1-nə Gürcüstan əhalisinin orta yaşı 38-dir.
