5 May tarixində, Gürcüstanın baş naziri İrakli Qaribaşvili Beynəlxalq Valyuta Fondunun (BVF) Mərkəzi və Mərkəzi Asiya Departamentinin missiyasının rəhbəri Ceyms Con ilə görüşüb.
QafqazTürk xəbər verir ki, məlumatı Gürcüstanın baş nazirinin mətbuat xidməti yayır.
Hökumət administrasiyasında keçirilən müşavirədə ölkədəki mövcud iqtisadi vəziyyət müzakirə olunub. Bildirilib ki, Covid-19 pandemiyasının yaratdığı böhrandan sonra ölkədə güclü iqtisadi canlanma müşahidə olunub və qlobal çağırışlara baxmayaraq, yuxarıda qeyd olunan dinamika hələ də davam edir.
Gürcüstanın baş naziri BVF missiyasının rəhbəri ilə görüşdə Beynəlxalq Valyuta Fondunun hazırkı proqramını müzakirə edərkən onun əhəmiyyətini vurğulayıb.
Hökumət başçısı Ceyms Cona Gürcüstanın struktur, maliyyə və iqtisadi islahatları yolunda Beynəlxalq Valyuta Fondunun dəstəyinə görə təşəkkür edib.
İrakli Ğaribaşvili vurğulayıb ki, ölkə hələ də islahatlara sadiqdir. Görüşdə Beynəlxalq Valyuta Fondunun Gürcüstandakı daimi nümayəndəsi Səlim Çakır da iştirak edib.
