სკოლებში საბაზო საფეხურს ერთი წელი დაემატება და 9 კლასის ნაცვლად 10 კლასი იქნება, რაც იმას იშნავს, რომ 10 კლასის ჩათვლით სწავლა სავალდებულო ხდება – აღნიშნული კანონპროექტი პარლამენტის განათლების კომიტეტმა პირველი მოსმენით უკვე განიხილა და როგორც განათლების მინისტრის მოადგილემ, ნოდარ პაპუკაშვილმა განაცხადა, მოსწავლეებს გამოცდების ჩაბარება მოუწევთ, როგორც დაწყებით, ისე საბაზო და საშუალო საფეხურზე.
„ეროვნული სასწავლო გეგმა ისე გადანაწილდება, რომ ბავშვის ფსიქოლოგიური მდგომარეობა არ იყოს დატვირთული; რაციონალურად განაწილდება ის ცოდნის მიღება მოსწავლეებში, რაც აქამდე 9 წელში ხორციელდებოდა. დაემატება ის მნიშვნელოვანი სეგმენტები, რომლებიც საჭირო იქნება მისი უნარების განსავითარებლად. ეს ერთი დიდი რეფორმის ნაწილია… თუმცა აქვე ვიტყვი – მიდის მუშაობა, რომ დაწყებით და საბაზო საფეხურზე განმავითარებელი გამოცდები იქნება დადგენილი, ხოლო საატესტატო – საშუალო განათლების ზოგადი გამოცდა იქნება მე-12 კლასში“, – განაცხადა ნოდარ პაპუკაშვილმა.
