Tbilisi Dövlət Universitetinin birinci korpusu yaxınlığında “Tələbələr rus rejiminə qarşı!” etiraz aksiyası başlayıb. Tələbələr “Gürcü arzusu”nun təşəbbüsü ilə irəli sürülən rus qanununa etiraz edirlər.
QafqazTürk.com xəbər verir ki,mitinq iştirakçıları TDU-ya bitişik ərazidən Parlamentə doğru hərəkət edirlər. Onların əsas mesajı “Rus qanununa yox, Avropaya!”dır.
Bundan başqa, TDU tələbələri İrakli Kobaxidzeni öz universitetlərində mühazirə oxumaq hüququndan məhrum etmək üçün imza toplamağa başlayıblar.
“Tbilisi Dövlət Universitetinin tələbələri imza toplamağa başlayır və biz petisiya yaradacağıq. Bizim məqsədimiz və tələbimiz o olacaq ki, İrakli Kobaxidze daha TDU-da işini davam etdirməsin. Onun tələbələrlə təmasda olmağa mənəvi və hüquqi haqqı yoxdur. Biz hökumətin həyata keçirdiyi Rusiyayönümlü siyasəti görürük. Başa düşürük ki, universitetin rektoru Jaba Samuşia bütün bunları nəzərə almayacaq, lakin ictimaiyyətə çatdırmaq niyyətindəyik ki, TDU tələbələri İrakli Kobaxidzenin onun işini davam etdirməsini istəmirlər”, – deyə tələbələr bildiriblər.
Tələbələrin aksiyasına məşhur gürcü tarixçisi Yulon Qaqoşidze də qoşulub.
