ABŞ prezidenti Donald Trampın sözlərinə görə, Müdafiə Nazirliyi ABŞ-ın nüvə silahlarını sınaqdan keçirməyə başlayacaq. Trampın bildirməsinə görə, bu qərar digər ölkələrin oxşar fəaliyyətləri səbəbindən verilib.
QafqazTürk Media xəbər verir ki, O, bunu Truth Social səhifəsində yazıb.
“Birləşmiş Ştatlar heç bir digər ölkədən daha az deyil — bizdən daha çox nüvə silahına malik ölkə yoxdur. Mən ilk vəzifə müddətimdə mövcud arsenalı yeniləməklə buna nail oldum. Bu misilsiz dağıdıcı güc nəzərə alınmaqla mən bunu etməkdən çəkinsəm də, başqa yol qalmadı. Rusiya ikinci, Çin üçüncü yerdədir, amma 5 il ərzində onlar bizim səviyyəyə çatacaqlar. Digər ölkələrin də silah sınaqları proqramları olduğundan, Mən Müdafiə Nazirliyinə əmr etdim ki, bizim də nüvə silahlarımızı eyni səviyyədə sınaqdan keçirsin,” — Tramp yazıb.
Qeyd edək ki, Rusiya prezidenti Vladimir Putin oktyabrın 26-da bildirib ki, son günlər keçirilən nüvə qüvvələrinin təlimləri çərçivəsində “Burevestnik” adlanan, nüvə mühərriki ilə təchiz olunmuş qanadlı raket uğurla sınaqdan keçirilib. Kreml mətbuat katibi Dmitri Peskov isə sonra bəyan edib ki, Rusiyanın bu sınağı iki ölkə arasındakı münasibətlərə neqativ təsir göstərməməlidir.
Tramp Rusiyanın açıqlamasına reaksiya verərək əlavə edib ki, ABŞ-ın nüvə sualtı gəmiləri Rusiya sahilləri yaxınlığında yerləşdirilib və Putinin raket sınaqları yerinə müharibəni bitirməli olduğunu vurğulayıb.
