Taliban qadınların evdə olarkən çöldə görünməsinin qarşısını almaq üçün Əfqanıstanda yaşayış binalarında pəncərələri qadağan edib. Taliban lideri Hibətullah Axundzadənin dörd bənddən ibarət fərmanına əsasən binaların qadınların otura və ya ayaq üstə dura bildiyi yerlərdə pəncərələri olmamalıdır.
QafqazTürk Media xəbər verir ki, bu barədə məlumatı İndependent yayıb.
Hökumət sözçüsü Zəbihullah Mücahidin də verdiyi fərmanda deyilir ki, yeni tikililərin həyətə, mətbəxə, adətən qadınların istifadə etdiyi ərazilərə baxan tərəfində pəncərələr olmamalıdır.
Sərəncamda deyilir ki, pəncərələri yeni qaydalara uyğun olmayan evlərdə sahiblərdən “qonşuların narahatçılığının qarşısını almaq üçün” ya divar hörmək, ya da mənzərəni bağlamaq tələb olunacaq.
Human Rights Watch təşkilatının qadın hüquqları üzrə direktor vəzifəsini icra edən Heather Barry Independent-ə deyib:
“İnsanlar Talibanın qadınları məcazi şəkildə məhv etməsindən danışırlar, lakin bu, metafora deyil. Onlar artıq qadınların səsinin ictimai yerlərdə eşidilməməsi əmrini veriblər, indi isə mahiyyətcə qadınların hətta pəncərədən baxmasına mane olurlar. Onlar icazə vermirlər. Bu, qadının şəxsiyyətinin tam bir məhvidir və bunun necə bitəcəyi barədə heç bir fikrimiz yoxdur.”
