Sudandan təxliyyə edilən 20 Gürcüstan vətəndaşı vətənlərinə qayıdıb. Təxliyyə edilən “Geosky” aviaşirkətinin əməkdaşları səhər saat 10 iradələrində Tbilisiyə qayıdıblar.
Onların sözlərinə görə, vəziyyət Sudanda ağır və dözülməz olub. Gürcüstan vətəndaşlarının qaynar nöqtədən çıxarılmasında Gürcüstan Xarici İşlər Nazirliyinin də iştirak etdiyi bildirilir. Onlar Ukrayna Müdafiə Nazirliyinin kəşfiyyat idarəsinin bu prosesdə iştirak etdiyini təsdiqləmirlər.
“10 gün üsyançıların əhatəsində qaldıq. Şərait həqiqətən dözülməz idi. Hər səhər, hər saat şəhər atəşə tutulurdu. Sadəcə cəhənnəm idi, insanlar, uşaqlar, qadınlar qaçırdılar. Ölkədə suyun miqdarı kifayət qədər az idi. Ümumilikdə biz səhrada 2500 kilometr yol getdik”, – aviaşirkətin əməkdaşlarından biri bildirib.
Sabah səhər saat 10-da daha 10 Gürcüstan vətəndaşı Sudandan qayıdacaq. Onlar “Myway” aviaşirkətinin əməkdaşlarıdır.
Qeyd edək ki, aprelin 15-də Sudanın paytaxtı Xartumda Sudan ordusu ilə paramilitar Çevik Dəstək Qüvvələri arasında başlayan və indiyənədək yüzlərlə insanın həyatına son qoyan silahlı qarşıdurma baş verir.
Sudandan əcnəbi vətəndaşların təxliyyəsi müvəqqəti atəşkəs şəraitində həyata keçirilir. Amerikalı diplomatlar və onların ailə üzvləri artıq Sudanı tərk ediblər. İspaniya öz vətəndaşlarını təxliyə edib. Fransa və Almaniya da 700-ə yaxın insanı təxliyə edə bildiklərini bildiriblər. Danimarka, Hollandiya, İsveçrə və İsveç də vətəndaşlarını geri çağırıb. Əhalinin bir hissəsi Qırmızı dəniz vasitəsilə Port Sudandan təxliyə edilib. Sudan vətəndaşlarının özləri də hər cür yolla ölkəni tərk etməyə çalışırlar.
