2024-cü ilin aprelindən etibarən Alyaskada müşahidə edilən seysmik aktivlik alimlərdə narahatlığa səbəb olur. Bu, Ankoricdən 123 kilometr aralıda yerləşən Spurr vulkanının püskürməsinin əlaməti ola bilər.
Qeyd edək ki, bu şəhərdə 300 minə yaxın insan yaşayır.
Son on ayda burada seysmik aktivlik xeyli artıb. Əgər əvvəllər həftədə 30 zəlzələ qeydə alınırdısa, indi onların sayı 125-ə çatıb.
39 illik dincəlmədən sonra Mount Spurr vulkanı sonuncu dəfə 1992-ci ildə püskürüb. Vulkan külü səbəbindən Ankoric sakinləri küçəyə çıxa bilməyiblər və ya maska taxıblar. Kül təmizlənənə qədər hava limanları fəaliyyətini davam etdirə bilməyib.
“Böyük vulkanik kül buludu Şimali Amerikadan Alyaska vasitəsilə Asiyaya uçuşlara da təsir edəcək”, – ABŞ Geoloji Xidmətindən Matt Hain bildirib.
