Rusiya və Çin, Qərbin sanksiyaları nəticəsində yaranan bank ödənişləri ilə bağlı problemlərə görə, payızdan etibarən ikitərəfli ticarətdə barterə keçə bilər.
QafqazTürk Media xəbər verir ki, bu barədə məlumatı Reuters yayıb.
Beynəlxalq ticarətdə barter puldan istifadə etmədən iki ölkə arasında mal və ya xidmətlərin birbaşa mübadiləsidir. Bu, xüsusilə ölkənin xarici valyutaya çıxışının məhdud olduğu və ya ticarət maneələrinin mövcud olduğu vəziyyətlərdə ənənəvi ixrac və idxal sisteminə alternativ ola bilər.
Putinin may ayında Çinə səfəri zamanı bank ödənişlərinin gecikdirilməsi məsələsi gündəmdə idi. Düzdür, daha sonra tərəflər Vaşinqtonun aşkarlaması nisbətən çətin olan kiçik regional Çin banklarının daxil edilməsi şəklində həll yolu tapdılar, lakin buna baxmayaraq, ödəniş problemləri həll olunmayıb.
Barter ticarəti Moskva və Pekinə problemlərdən yan keçməyə, ikitərəfli əməliyyatlar üzrə Qərb tənzimləyicilərinin nəzarətini azaltmağa və valyuta risklərini məhdudlaşdırmağa imkan verəcək.
Reuters-in hesablamalarına görə, Çin və Rusiya arasında barter başlasa, bu, son 30 ildə ilk dəfə baş verəcək. Belə sxemlər bank sektorunun inkişafı nəticəsində unudulub.
Məlumat üçün bildirək ki, ABŞ-ın sanksiyaları tətbiq etməsindən sonra Moskva birjası faktiki olaraq valyuta “mübadilə məntəqəsinə” çevrildi, burada yeganə əsas valyuta Çin yuanı oldu. Bundan əlavə, Rusiyadan gələn maye qazın çinli alıcıları hətta sanksiyalar siyahısına daxil olmayan şirkətlərdən də endirim tələb edirlər. Həmçinin, iyulun 1-dən Çin Rusiyanın hərbi sənayesində istifadə oluna bilən ikili təyinatlı mal və məhsullara ixrac nəzarətini gücləndirib. Bundan əlavə, iyunun 24-dən etibarən Bank of China-nın Rusiyadakı törəmə bankı Amerika sanksiyaları səbəbindən Rusiya bankları ilə bütün əməliyyatlarını dayandırıb.
