“Moskva Rusiya qazının Ukrayna ərazisindən keçməklə Avropaya tranzitini dayandırmaqda Vaşinqton və Kiyevi günahlandırır”.
QafqazTürk Media xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova bildirib.
Onun sözlərinə görə, Kiyev “Qazprom”un müqavilə üzrə öhdəliklərini yerinə yetirməsinə baxmayaraq, Rusiyadan Avropa ölkələrinin sakinlərinə mavi yanacağın vurulmasını dayandırmaq qərarına gəlib.
“Rəqabət qabiliyyətli və ekoloji cəhətdən təmiz Rusiya enerji daşıyıcılarının tədarükünün dayandırılması təkcə Avropanın iqtisadi potensialını zəiflətmir, həm də Avropa vətəndaşlarının həyat səviyyəsinə çox mənfi təsir göstərir”, – Zaxarova qeyd edib.
Onun sözlərinə görə, “Kiyevin qərarından əsas faydalanan ABŞ-dır”.
“Rusiyanın qaz təchizatının dayandırılmasına görə məsuliyyət tamamilə ABŞ-ın, marionet Kiyev rejiminin, eləcə də öz vətəndaşlarının rifahını Amerika iqtisadiyyatının maliyyə dəstəyinə qurban verən Avropa dövlətlərinin hökumətlərinin üzərinə düşür”, – Zaxarova deyib.
Xatırladaq ki, Ukrayna yanvarın 1-dən Rusiya qazının öz ərazisi ilə Avropaya tranzitini dayandırıb.
