“The New York Times” tərəfindən yayımlanan məlumata əsasən, 19 may 2025-ci il tarixində Rusiyanın Finlandiya ilə sərhəddə yerləşən bölgələrdə hərbi infrastrukturun genişləndirildiyi peyk şəkilləri vasitəsilə müşahidə olunub.
Murmansk yaxınlığında yerləşən Olenya hava bazasında uzun mənzilli Tu-22 bombardmançı təyyarələrinin sayında əhəmiyyətli artım qeydə alınıb. Son 20 ildə ilk dəfədir ki, bu bazada belə bir hərbi aktivlik müşahidə olunur.
Alakurtti şəhərində, Finlandiya sərhədindən təxminən 50 kilometr məsafədə, yeni binaların tikildiyi və bu binaların onlarla hərbi texnikanı yerləşdirmək üçün nəzərdə tutulduğu bildirilib. Bənzər tikinti işləri Kareliya Respublikasının paytaxtı Petrozavodskda da müşahidə olunub.
Sankt-Peterburq vilayətinin Kamenka qəsəbəsində, Finlandiya sərhədindən təxminən 65 kilometr məsafədə yerləşən Soyuq Müharibə dövrünə aid hərbi bazada 130-dan çox hərbi çadırın qurulduğu və bu ərazinin yenidən aktivləşdirildiyi qeyd olunub.
Xatırladaq ki, Finlandiya, 2023-cü ilin dekabr ayında Rusiyadan gələn sığınacaq axtaranların sayının artması səbəbilə sərhəd keçidlərini bağlamışdı. Bu hadisə, Helsinki tərəfindən Kremlin hibrid əməliyyatı kimi qiymətləndirilmişdi.
