2023-cü ilin iyulundan Qazaxıstanda 4 günlük iş həftəsi tətbiq olunacaq. Bu barədə yerli KİV məlumat yayıb.
Yeni qanuna əsasən, iyulun 1-dən ölkənin Əmək Məcəlləsinə dəyişiklik ediləcək və 4 günlük iş həftəsi konsepsiyası tətbiq ediləcək. Hazırda Məcəllədə yalnız 5 günlük və 6 günlük iş həftəsi, habelə müddəti tərəflərin razılığı əsasında müəyyən edilən natamam iş anlayışları müəyyən edilir.
Məlumata görə, Qazaxıstanın əmək qanunvericiliyinə edilən yeniliklərin məqsədi ölkə sakinlərinə istirahət üçün daha çox vaxt verməkdir. Əmək Məcəlləsində beşgünlük və altıgünlük iş həftələri də nəzərdə tutulub. Qeyd edilir ki, iş həftəsinin müddəti tərəflər arasında razılaşmaya əsasən müəyyən olunur. Bəzi təşkilatlarda beşgünlük və altıgünlük iş həftələri növbələşdirilə bilər.
İş həftəsinin uzunluğundan asılı olmayaraq bazar günü ümumi istirahət günüdür. Beşgünlük və altıgünlük iş həftəsində ikinci və üçüncü istirahət günləri kollektiv müqaviləyə və ya əmək intizamı qaydalarına əsasən müəyyən olunur.
Dördgünlük, beşgünlük və altıgünlük iş həftələrində iş günündən əlavə iş müddəti ayda 12 saatdan çox, iş vaxtının məcmu uçotu müəyyən edilən hallarda isə ildə 120 saatdan çox olmamalıdır.
