Mixeil Qavelashvili “İnzibati Xətalar Məcəlləsi” və “Gürcüstan Cinayət Məcəlləsi”ndə dəyişikliklərə imza atıb.
QafqazTürk Media xəbər verir ki, bu dəyişikliklərlə etiraz aksiyaları və toplaşmalarla bağlı qaydalar və hüquqi məsuliyyətlər sərtləşdirilib.
İmzalanmış sənəd artıq qanunvericilik rəsmi xəbərdarlığında dərc olunub və 16 oktyabr tarixi ilə qüvvəyə minib, yəni qanunlar dərc olunduğu anda tətbiq olunmağa başlayıb.
Xatırladaq ki, bu gün parlament həmin paket qanunları təcili qaydada müzakirə edib və 80 səs lehinə olmaqla qəbul edib.
Dəyişikliklərə görə, əgər toplaşma və ya aksiya iştirakçısı üzünü maska ilə gizlədirsə, göz yaşardıcı və ya zəhərli maddəyə malikdirsə, yolu bağlayırsa və ya müvəqqəti konstruksiya quraşdırırsa, ilk halda inzibati həbs 15 günədək tətbiq olunacaq. Oxşar hərəkət aksiyanın təşkilatçısına aid olarsa, həbs müddəti 20 günədək artırılacaq.
Əgər polis tərəfindən dayandırılması tələb olunan toplaşmada iştirak olunarsa, inzibati həbs 60 günədək veriləcək. Eyni müddət silah, pirotexnika və ya digər təhlükəli predmet daşıyan iştirakçılara da şamil ediləcək.
Cinayət Məcəlləsinə əlavə edilmiş dəyişikliklərə əsasən, belə hərəkətlərin təkrarlanması bir ilədək cinayət məsuliyyəti, üçüncü və hər sonrakı dəfə isə iki ilədək cəza ilə nəticələnəcək.
Məcəlləyə yeni maddə əlavə olunub ki, bu, hüquq-mühafizə orqanına qarşı hörmətsizlik göstərən və ya qanuni tələblərə əməl etməyən şəxsləri üçüncü dəfə cəzalandırmağı nəzərdə tutur.
Qanun həmçinin yeniyetmələrə də şamil olunur: toplaşma və etiraz aksiyaları qaydalarını pozan yetkinlik yaşına çatmamış şəxslər cərimə, bir ilə qədər islah işləri və ya bir ilədək həbs cəzası ala bilərlər.
