Abdullah Öcalanın çağırışı ilə mayın 5-7-də qurultayını toplayan PKK-nın təşkilatın ləğv olunduğunu elan etməsindən sonra siyasətçilərdən bir-birinin ardınca dəstək mesajları gəldi.
Milliyyətçi Hərəkat Partiyasının (MHP) sədri Dövlət Baxçalı “Bu gün qazanan sülh və qardaşlıqdır. Bu gün qazanan siyasət və demokratiyadır”,- deyib.
Baxçalı verdiyi yazılı açıqlamada prezident Rəcəb Tayyib Ərdoğan və “PKK-nın qurucu lideri” adlandırdığı Abdullah Öcalana, həmçinin təmas və görüşləri həyata keçirən DEM Partiyasına və heyətə təşəkkür edib.
Baxçalı mesajında bildirib ki, Suriyada silahların yerə qoyulması, yaraqlıların gələcəyi, PKK-YPG münasibətləri kimi məsələlərin hüquqi və strateji çərçivəsinin necə müəyyən ediləcəyi ayrı-ayrılıqda müzakirə edilməlidir.
Xarici işlər naziri Hakan Fidan da belə deyib: “Tarixi və önəmli bir qərardır. Xüsusilə daimi sülh və sabitlik baxımından bu qərarı son dərəcə əhəmiyyətli hesab edirəm. Bu qərarın qəbulundan sonra atılmalı olan praktiki addımlar var, bunları yaxından izləyəcəyik.”
