Gürcüstan Parlamentinin payız sessiyası gələn həftə – 2 sentyabrda açılacaq. Parlamentin daxili nizamnaməsinə görə, payız sessiyası hər ilin sentyabr ayının ilk çərşənbə axşamı başlayır və dekabrın üçüncü cümə günü başa çatır.
Sessiyanın ilk plenar iclasında əsasən kadr məsələlərinin müzakirəsi gözlənilir. Deputatlar Dövlət Təhlükəsizlik Xidmətinin rəhbəri vəzifəsindən istefa vermiş Anri Oxanaşvilinin səlahiyyətlərinin tanınması və onun yerinə Mamuka Mdinaradzenin seçilməsi məsələsinə baxacaqlar. Bundan əlavə, parlament “Gaxaria Gürcüstan üçün” partiyasının mandatlarını itirmiş deputatlarının yerinə gələn yeni üzvlərin səlahiyyətlərinin tanınması barədə də qərar qəbul edəcək.
Payız sessiyasının gündəliyindəki əsas məsələlərdən biri də müvəqqəti istintaq komissiyasının hesabatı olacaq. 430 səhifəlik sənədin komissiya sədri Tea Çulukiani bildirib ki, hesabatda 2003-cü ilin noyabrından bu günədək “Vahid Milli Hərəkatın”, sabiq prezident Mixail Saakaşvilinin və onlarla əlaqəli şəxslərin fəaliyyəti barədə bütün faktlar əksini tapıb.
Həmçinin, sessiyada parlamentə “Gürcü Arzusu” fraksiyasının təqdim etdiyi qanunvericilik paketi də daxil ediləcək. Layihəyə əsasən, müəyyən cinayət nəticəsində zərər çəkmiş şəxslərə zərərin sadələşdirilmiş qaydada ödənilməsi imkanı yaradılır. Mexanizmə görə, zərər həm cinayəti törətmiş şəxsin, həm də onun yaxın qohumlarının və əlaqəli şəxslərin əmlakı hesabına ödənilə biləcək. Qanun layihəsi artıq iki oxunuşdan keçib, yalnız üçüncü – redaktə xarakterli müzakirə qalıb.
Sessiyanın ilk plenar iclasının yekun gündəliyi parlamentin büro iclasında müəyyən olunacaq. Büro 1 sentyabrda toplanacaq.
