Gürcüstan parlamentinin sədri Şalva Papuaşvili ümid edir ki, Almaniyanın səfiri Piter Fişerin məsləhətləşmələr üçün geri çağırılması iki ölkə arasında münasibətlərin “yenidən yüklənməsi” siqnalıdır.
Papuaşvili səfir Fişeri yenidən tənqid edərək bildirib ki, “o, hökumətlər arasında körpü rolunu oynamaq əvəzinə divar rolunu seçib”.
“Biz hesab edirik ki, Almaniya hökumətində müəyyən düşüncə aparılıb ki, mövcud səfir təəssüf ki, hökumətlər arasında körpü rolunu oynamaq əvəzinə, ölkələrimiz və hökumətlərimiz arasında divar rolunu seçib, bu isə təəssüf doğurur. Onun tərəfdən hökumətimizə yönəlmiş hücumları və radikal qruplara göstərdiyi dəstəyi gördük, bu da təəssüf doğurur. Mən əvvəllər də demişdim ki, 30 illik xüsusi tərəfdaşlıq təəssüf ki, Almaniya səfirinin əlində çox aşağı səviyyəyə enib. Buna görə də ümid edirik ki, bu, münasibətlərin yenidən nəzərdən keçirilməsi üçün siqnaldır. Təbii ki, hazırıq ki, Almaniya ilə münasibətlərimiz əvvəlki vəziyyətinə geri dönsün.
Bizim üçün əsas fakt odur ki, səfir geri çağırılıb. Mən detallara getməyəcəyəm, mövqelərimiz Almaniya səfirinin fəaliyyəti ilə bağlı məlumdur. Bu mövqedə qalırıq və yalnız biz yox, bütün cəmiyyət bunu görüb. Ümid edirik ki, bu siqnal olacaq ki, səfir körpü rolunu oynasın, divar rolunu deyil. Bu, hər bir səfir üçün yaxşı nümunə olmalıdır ki, öz diplomatik missiyasının çərçivəsində qalsın və təmsil etdiyi ölkə ilə Gürcüstan hökuməti arasındakı münasibətlərin inkişafına xidmət etsin”.
Qeyd edək ki, 19 oktyabr tarixində Almaniya Gürcüstandakı səfir Piter Fişeri məsləhətləşmələr üçün geri çağırıb.
Almaniyanın Xarici İşlər Nazirliyi açıqlamasında bildirib ki, Gürcüstan hökuməti hələ də Avropa İttifaqına, Almaniyaya və səfirə qarşı hücumlarını davam etdirdiyindən səfirin müvəqqəti geri çağırılması zəruri olub.
“Artıq bir neçə aydır ki, Gürcüstan hökumətinin rəhbərliyi Avropa İttifaqına, Almaniyaya və şəxsən Almaniya səfiri Fişerə qarşı təbliğat aparır. Buna görə də Almaniyanın xarici işlər naziri qərar verib ki, səfir Fişer məsləhətləşmələr üçün geri çağırılsın və bundan sonra necə hərəkət edəcəyini müəyyənləşdirsin.”, – deyə nazirlik bildirib.
