Bu gün, yanvarın 21-i dövrümüzün böyük söz ustadı, təkcə Gürcüstanın və Azərbaycanın deyil, eləcə də bütün Türk Dünyasının fəxri olan Xalq şairi Zəlimxan Yaqubun Doğum Günüdür: 75 yaşı tamam olur.
Xatırladırıq ki, az əvvəlki Bəyanatımızla 2025-ci ili “Zəlimxan Yaqub ili” elan etmişik!
Unutmayaq ki, böyük şairlərin, sənət adamlarının, əslində, yalnız doğum günləri var!
Sağ kimi doğum günləri!
Biz, Gürcüstan Azərbaycanlıları Konqresi və Qafqaz Türk Media ailəsi olaraq, həmişəyaşar şairimizin 75 yaşını həm fəxrimiz olan böyük şair, həm də ailəmizin doğma üzvü kimi ürəkdən təbrik edirik!
Söz vermişik ki, yaradıcılıqda özünəməxsus dəst-xəttə malik, ölməz əsərləri ilə milyonların qəlbində özünə heykəl quraraq hələ sağlığında heykəlləşən şairimizin yubileyini doğulduğu Kəpənəkçidə, Bolnisidə, Marneulidə, Tbilisidə, bütövlükdə Gürcüstanımızın digər bölgələrində və qardaş Türkiyənin Qars Qafqaz Universitetində ona, onun poeziyasına layiq şəkildə keçirəcəyik!
Çünki Azərbaycan-Gürcüstan-Türkiyə əlaqələrini uca zirvələrə daşıyan bu vətənsevər, yurdsevər şairimizə bəslənilən ümumxalq sevgisi sərhədsizdir!
Ümidvarıq ki, poeziyasevərləri, sazsevərləri, Zəlimxan Yaqub poeziyasının işığına yığmağı bacaracağıq!
Xatirəsinin əbədiləşdirilməsi istiqamətində silsilə tədbirlər həyata keçirməyi, şeir müsabiqələri, müxtəlif aşıq havaları üstündə şeirlərinin ifasını nəzərdə tutmuşuq. Çünki müasir Azərbaycan ədəbiyyatının yeni mərhələsində Zəlimxan Yaqubun çoxcəhətli yaradıcılığı əsl ədəbi hadisədir!
Onun əsərləri xalqımıza məxsus mütləq dəyərlərin, folklor yaradıcılığı qaynaqlarından süzülüb gələn ənənələrin diriliyi ilə səciyyələnir, ədəbiyyatımızda irsilik ideyasını tərənnüm edir.
Bir daha deyirik: Zəlimxan Yaqubun Doğum Gününə, Zəlimxan Yaqub İlinə xoş gəldiniz, dostlar!
Doğum Günün mübarək, Şair!
Özün demiş:
Allah özü verib ucalıqları,
Bu ulduz, bu hilal şairlərinə!
Gürcüstan Azərbaycanlıları Konqresi
