Macarıstanın xarici işlər naziri Peter Szijjarto bildirib ki, Macarıstan gürcü diplomatları üçün vizasız gediş-gəlişi dayandırmayacaq.
“Macarıstan Gürcüstanla xidməti və diplomatik pasport sahibləri üçün vizasız gediş-gəliş haqqında mövcud sazişi dayandırmayacaq. Biz hesab edirik ki, ölkənin gələcəyi ilə bağlı qərar Brüsseldə deyil, Gürcüstanda qəbul edilməlidir və gürcülər Brüsselin xoşuna gəlib-gəlməməsindən asılı olmayaraq, aydın qərar qəbul ediblər”, – Peter Szijjarto bildirib.
Xatırladaq ki, dünən Avropa İttifaqı Şurası Gürcüstanın diplomatik və xidməti/rəsmi pasport sahibləri üçün vizasız rejimin dayandırılması barədə qərar qəbul edib.
Avropa Birliyinin Xarici İşlər və Təhlükəsizlik Siyasəti üzrə Ali Nümayəndəsi Kaia Kallas, “Gürcüstan diplomatları üçün viza liberallaşdırılmasının dayandırılmasının indi üzv dövlətlər tərəfindən öz daxili qaydalarına daxil edilməli olduğunu” bildirərək Avropanın bu məsələdə belə işlədiyini qeyd edib.
