Litva Prezidenti Qitanas Nauseda bildirib ki, Rusiya hərbi təyyarələri Litvanın hava məkanını pozub.
“Bu axşam Rusiya hərbi təyyarələri Litvanın hava məkanını pozub. Bu, beynəlxalq hüququn və Litvanın ərazi bütövlüyünün açıq şəkildə pozulmasıdır. Hadisə bir daha göstərir ki, Avropanın hava hücumundan müdafiə qabiliyyətinin gücləndirilməsi vacibdir”, – deyə Nauseda vurğulayıb.
Prezidentin sözlərinə görə, Litva Xarici İşlər Nazirliyi bu ehtiyatsız və təhlükəli hərəkətə etiraz bildirmək üçün Rusiya səfirliyinin nümayəndələrini çağıracaq.
Litva Silahlı Qüvvələrinin məlumatına əsasən, Rusiyaya məxsus qırıcı və nəqliyyat təyyarəsi Kalininqrad vilayətindən Litva ərazisinə daxil olub. Təyyarələr təxminən 700 metr məsafədə Litvanın hava məkanına keçərək 18 saniyə sonra ərazini tərk ediblər.
