Kutaisi Beynəlxalq Hava Limanında 3,5 km uzunluğunda yeni uçuş-enmə zolağının və hava limanının infrastrukturunun tikintisinə başlanılır.
QafqazTürk Media xəbər verir ki, bu barədə Aeroportlar İttifaqı məlumat yayıb.
“Yeni uçuş-enmə zolağının tikintisi hava limanının yaxınlığında logistika mərkəzinin və yük terminalının inkişafına töhfə verəcək. Həmçinin, gələcəkdə irihəcmli (geniş gövdə deyilən) təyyarələrin qəbulu Kutaisi hava limanına uzaq məsafələrdən yeni hava marşrutları əlavə etmək imkanı verəcək.
Layihənin investisiya dəyəri 240 milyon lariyə qədərdir. 3,5 km uzunluğunda yeni uçuş-enmə zolağının və hava limanı infrastrukturunun tikintisi dünyanın ən nüfuzlu aviasiya konsaltinq şirkətlərindən biri olan IATA Consulting tərəfindən bu yaxınlarda tamamlanan Kutaisi Beynəlxalq Hava Limanının ümumi inkişaf planının birinci mərhələsinin bir hissəsidir.
Layihəni “Anagi” tikinti şirkəti həyata keçirəcək və onun başa çatdırılması 2026-cı ilin yazında planlaşdırılır.
Bundan sonra Kutaisi Beynəlxalq Hava Limanı Gürcüstanda böyük təyyarələri məhdudiyyətsiz qəbul edə biləcək yeganə hava limanı olacaq.
Bu gün Kutaisi Beynəlxalq Hava Limanı D kodu ilə fəaliyyət göstərir, onun uçuş-enmə zolağının uzunluğu (ADZ) 2,5 km-dir ki, bu da orta ölçülü təyyarələrin istismarını təmin edir”, – məlumatda deyilir.
