“Bizim çox mühüm xarici prioritetlərimiz var, təbii ki, əsas prioritet Avropaya inteqrasiyadır!”.
QafqazTürk Media xəbər verir ki, baş nazir İrakli Kobaxidze bu barədə hökumətin iclasında bildirib.
Kobaxidzenin qeyd etdiyinə görə, Gürcüstanın 2030-cu ilə qədər Avrointeqrasiya məqsədinə çatması üçün ölkəni bütün istiqamətlərdə inkişaf etdirmək vacibdir və onun fikrincə, bunun üçün hər şey ediləcək.
Bu kontekstdə Kobaxidze əsas diqqəti iqtisadi artıma yönəldərək “iqtisadi göstəricilər uyğun olmasa, heç kim ölkəni Avropa İttifaqında qəbul etməyəcək” deyib.
“Gələn ilin əvvəlindən baş verəcəyini düşündüyümüz münasibətlərin bərpasını gözləyirik. Bizim Assosiativ Saziş və Azad Ticarət Sazişi ilə üzərimizə qoyulan konkret öhdəliklər var. Bizim iddialı vəzifəmiz 2028-ci ilə qədər hər iki istiqamətdə bu öhdəliklərin 90%-dən çoxunu yerinə yetirməkdir. Bu, son nəticədə 2030-cu ilə qədər Gürcüstanın bizim qarşıya qoyduğumuz yekun məqsədə, yəni ölkəmizin Avropa İttifaqına tam inteqrasiyasına nail olmasını təmin edəcək.
Bunun üçün ölkəni bütün istiqamətlərdə, o cümlədən iqtisadi artımla inkişaf etdirmək lazımdır. İqtisadi göstəricilər uyğun olmasa, heç kim ölkəni Avropa İttifaqında qəbul etməyəcək”, – Kobaxidze bildirib.
