Ətraf Mühitin Mühafizəsi və Kənd Təsərrüfatı Nazirliyinin təşəbbüsü ilə Kənd İnkişaf Agentliyi istixana yaratmaqda maraqlı olanlar üçün yeni proqrama start verib.
QafqazTürk Media xəbər verir ki, proqramın məqsədi müasir iqlim-ağıllı texnologiyaların tətbiqi yolu ilə bütün ölkə ərazisində bir illik kənd təsərrüfatı bitkilərinin istehsalını təşviq etməkdir.
Proqramın vəzifəsi yeni istixana təsərrüfatlarının yaradılması üçün lazımi vəsaitə çıxışı təmin etməklə, mövsümdənkənar dövr də daxil olmaqla, istixana şəraitində istehsal olunan məhsulların həcmini artırmaqdan ibarətdir.
Yuxarıda qeyd olunan məqsədlə potensial benefisiar həm qrant şəklində, həm də kommersiya bankı tərəfindən verilmiş kreditin faiz dərəcəsinin tam maliyyələşdirilməsi şəklində birləşmiş maliyyələşdirmə növünü əldə edə bilər. Kreditin məbləği ən azı 50.000 lari və 1.000.000 laridən çox olmamalıdır, qrant maliyyələşdirilməsi isə kredit məbləğinin 30%-dən çox olmamaqla müəyyən edilir və benefisiar öz öhdəliklərini tam yerinə yetirdikdən sonra verilir. Bundan əlavə, ümumi maliyyələşdirmə kredit məbləğinin 50%-dən çox olmamaqla müəyyən edilir.
Proqram yeni iş yerlərinin yaradılmasına və dövlət tərəfindən müəyyən edilən birgə maliyyələşdirmə hesabına istixana təsərrüfatlarının genişləndirilməsinin təşviqinə töhfə verəcək. Proqram çərçivəsində müəyyən edilmiş dəstək mexanizmlərindən yararlandığı təqdirdə yerli benefisiarlar istixanalar yarada biləcək və bunun nəticəsində bağçılıq və tərəvəz bitkilərinin idxal əvəzlənməsi asanlaşdırılacaq və mövsümdənkənar da daxil olmaqla ixrac potensialı artırılacaq.
Qeyd edək ki, “İstixanalardan gürcü tərəvəzləri” yeni dövlət proqramının büdcəsi 25 milyon laridir.
