İranın xarici işlər naziri Abbas Arakçı bu həftənin sonunda İran və ABŞ arasında Omanda davam edən danışıqlara dair Moskva ilə məsləhətləşmələr aparmaq üçün Rusiyaya səfər edəcək.
O, səfərin əvvəlcədən planlaşdırıldığını, ABŞ-la danışıqlarla bağlı məsləhətləşmələrin aparılacağını bildirib.
İran və ABŞ keçən həftə Omanda müsbət və konstruktiv danışıqlar apardıqlarını və Tehranın nüvə proqramının eskalasiyasını müzakirə edəcək dialoq üçün şənbə günü yenidən görüşməyə razılaşdıqlarını bildiriblər.
ABŞ İranı nüvə silahı yaratmaq cəhdində ittiham edir. Tehran nüvə proqramının yalnız mülki məqsədlərə xidmət etdiyini deyir.
ABŞ prezidenti Donald Tramp İranın nüvə proqramının dayandırılmasına dair razılaşma əldə olunmazsa, hərbi əməliyyatların keçiriləcəyini istisna etməyib. O, dünən İran məsələsi ilə bağlı müşavirlərlə görüşdüyünü və tez qərar gözlədiyini bildirib.
