“İqlim dəyişikliyi eramızın ən kəskin çağırışlarından birinə çevrilir və onun çoxşaxəli nəticələrinin aradan qaldırılması üçün qlobal, təcili tədbirlər və əməkdaşlıq tələb olunur”.
QafqazTürk Media xəbər verir ki, bu barədə Gürcüstanın Baş naziri İrakli Kobaxidze COP29 liderlərinin sammitində çıxışı zamanı bildirib.
Hökumət başçısının sözlərinə görə, iqlim dəyişikliyi inkişaf etməkdə olan ölkələrin iqtisadiyyatını ciddi şəkildə pozur və xüsusilə həssas ölkələrin və yerli icmaların həyat şəraitini təhdid edir.
“Cənab Prezident, xanımlar və cənablar, Gürcüstan adından sizə müraciət etmək mənim üçün böyük şərəfdir. Mən ilk növbədə Azərbaycan Respublikasının Prezidenti cənab İlham Əliyevə, eləcə də Konfransın Sədri cənab Muxtar Babayevə və Azərbaycan Respublikası Hökumətinə göstərdikləri töhfəyə görə minnətdarlığımı bildirmək istəyirəm.
Bu tədbir mühüm əlamətdar hadisədir, çünki Cənubi Qafqaz regionu ölkəsi ilk dəfə olaraq BMT-nin İqlim Dəyişikliyi üzrə Çərçivə Konvensiyasının İştirakçılarının Konfransına ev sahibliyi edir. Azərbaycana bu istiqamətdə səmərəli və iddialı nəticələrin əldə edilməsində, danışıqlar prosesində əməkdaşlıq və konstruktiv dialoq ruhunun təşviqində uğurlar arzulamaq istərdim.
Bu konfrans kritik bir vaxta təsadüf edir, çünki iqlim dəyişikliyi çağımızın ən aktual problemlərindən biri kimi ortaya çıxır və onun çoxşaxəli nəticələrini həll etmək üçün təcili qlobal fəaliyyət və əməkdaşlıq tələb edir. Təəssüf ki, bu yolda gedən silahlı münaqişələr nəinki ciddi humanitar böhranlara gətirib çıxarır, həm də qlobal iqlim dəyişikliyi ilə mübarizə səylərini əngəlləyir və ləngidir.
İqlim dəyişikliyinin artan təsirləri, o cümlədən buzlaqların sürətlə əriməsi və dəniz səviyyəsinin qalxması inkişaf etməkdə olan ölkələrin iqtisadiyyatını ciddi şəkildə pozur və xüsusilə həssas ölkələrin və yerli icmaların yaşayış vasitələrini təhdid edir. Təəssüf ki, Gürcüstan da istisna deyil və iqlim dəyişikliyinin ağır nəticələri ilə üzləşir. Son illər insan hüquqları ilə ekologiya arasında əlaqə haqqında məlumatlılıq xeyli artıb”, – deyə baş nazir bildirib.
