Sağlam həyat tərzinin təbliği məqsədilə 17 saylı cəzaçəkmə müəssisəsində müasir standartlara cavab verən yeni stadion və məşq meydançası təşkil edilib.
QafqazTürk Media xəbər verir ki, Ədliyyə naziri Rati Breqadze Xüsusi Penitensiar Xidmətin rəisi Nika Tsvaraşvili ilə birgə görülən işlərlə tanış olub.
Yeni tikilən stadion süni səthə malikdir, futbol və basketbol üçün nəzərdə tutulub. Ətrafda da abadlıq işləri aparılıb.
İdman meydançası ilə yanaşı, müəssisənin ərazisində məhkumların asudə vaxtlarını daha səmərəli keçirmələri üçün yeni trenajorlarla məşq meydançası da tikilib.
Penitensiar müəssisələrdə sağlam həyat tərzinin təbliği Ədliyyə Nazirliyinin prioritet istiqamətlərindəndir. Bu məqsədlə 2022-ci ildən idman idarəçiliyi strategiyası tətbiq edilib ki, bu strategiya çərçivəsində məhkumlar müxtəlif idman tədbirlərində iştirak etmək imkanı əldə edirlər. Həmçinin, məhkumlara peşəkar məşqçi, fitnes təlimatçısı olmaq imkanı verən müxtəlif idman proqramları, təlim kursları mövcuddur. Bundan başqa, penitensiar müəssisələrdə infrastrukturun yenilənməsi prosesi davam edir.
