Gürcüstanda fəaliyyət göstərən 50-dən çox qeyri-hökumət və media təşkilatı birgə bəyanatla çıxış edərək “Vətəndaş Cəmiyyət Fonduna”, ISFED-ə, IDFI-yə, “Demokratiya Müdafiəçilərinə”, Gürcüstanın Demokratik Təşəbbüsünə (GDI), “Sapari”-a və Sosial Ədalət Mərkəzinə həmrəyliklərini ifadə ediblər.
Bəyanatda qeyd olunur ki, QHT-lərə qarşı Rusiyanın idarəçilik üslubunu xatırladan cəza tədbirlərinin tətbiqi hökumətin avropayönlü qrupları susdurmaq və fərqli fikirləri məhv etmək məqsədini açıq şəkildə göstərir.
Sənəddə vurğulanır ki, bu addımlar Gürcüstan hökumətinə Avropa İttifaqı tərəfindən verilmiş öhdəliklərin yerinə yetirilməməsi fonunda baş verir və vizasız rejimin gələcəyini təhlükə altına alır.
QHT-lərin fəaliyyətinin dayandırılmasının minlərlə vətəndaşı pulsuz hüquqi yardım və digər zəruri xidmətlərdən məhrum edəcəyi də bəyanatda xüsusi olaraq qeyd olunub.
“Biz həmkarlarımızın yanındayıq və azad, ədalətli, demokratik Gürcüstan uğrunda ortaq iradəmizi bölüşürük”, – bəyanatda bildirilib.
İmza atan təşkilatlar arasında “Beynəlxalq Şəffaflıq – Gürcüstan”, Gürcüstan Gənc Hüquqşünaslar Assosiasiyası, İnsan Hüquqları Mərkəzi, Media İnkişaf Fondu, Avropa–Gürcüstan İnstitutu, “Tbilisi Praidi”, “Batumelebi / Netgazeti”, GRASS və onlarla digər qurum yer alır.
