Gürcüstan-Qazaxıstan iqtisadi əməkdaşlığı Gürcüstan Biznes Assosiasiyasının nümayəndələrinin və Qazaxıstanın Qərb dairəsinin sahibkarlıq və sənaye inkişafına cavabdeh olan qurumların rəhbərlərinin görüşünün əsas mövzusu olub.
Qafqaztürk.com xəbər verir ki, bu barədə məlumatı Gürcüstan Biznes Assosiasiyası yayıb.
Assosiasiyanın açıqlamasına görə, nümayəndə heyətinin rəhbəri, rayon qubernatoru Nəriman Tureqaliev assosiasiyaya üzv şirkətlərin nümayəndələrinə Qazaxıstanın mövcud iqtisadi vəziyyəti, investisiyaları təşviq edən dövlət proqramları, Qərbi Qazaxıstan vilayətinin investisiya imkanları barədə ətraflı məlumat verib.
Təqdimat çərçivəsində rayonun ticarət əlaqələri, idxal və ixrac məhsulları, o cümlədən neft məhsullarının istehsalı və ixracı müzakirə olunub. Söhbətdə kənd təsərrüfatının emal sənayesi ilə yanaşı, heyvandarlıq və maşınqayırma istiqamətində rayonun təcrübəsinə də toxunulub.
Assosiasiyaya üzv şirkətlərin nümayəndələri Gürcüstan-Qazaxıstan iqtisadi əməkdaşlığı ilə bağlı müvafiq məsələləri müzakirə etmək imkanı əldə ediblər. Həmçinin tərəflər arasında gələcək əməkdaşlıq perspektivlərini müəyyən etmək mümkün olan sahələrə də diqqət yetirilib.
“Biz Qazaxıstan Respublikasının Gürcüstan Biznes Assosiasiyasında təmsil olunmasını alqışlayırıq. Bu cür ünsiyyət yeni imkanların kəşf edilməsi və investisiyaların qoyulması baxımından əhəmiyyətlidir. Görüşdə əməkdaşlığın bir neçə istiqaməti vurğulanıb ki, bu da sevindirici haldır və ölkələr arasında iqtisadi və işgüzar əlaqələri daha da gücləndirəcək”, – Gürcüstan Biznes Assosiasiyasının icraçı direktoru Levan Vepxvadze bildirib.