Ağciyər xərçənginə qarşı mRNT əsaslı ilk peyvəndin sınaqlarına başlanılıb.
QafqazTürk Media bu barədə dünya mediasına istinadən xəbər verir ki, mütəxəssislər bu peyvəndin minlərlə insanın həyatını xilas etmək potensialına sahib olduğunu iddia ediblər.
Bildiyimiz kimi ağciyər xərçəngi dünyada xərçəng ölümünün ən çox yayılmış səbəbi kimi tanınır və hər il təxminən 1,8 milyon insanın ölümünə səbəb olur. Xüsusilə şişlər yayıldıqda insanın sağ qalma nisbəti olduqca aşağıdır.
Hal-hazırda mütəxəssislər bədəni xərçəng hüceyrələrini məhv etməyə yönəldən, eyni zamanda həmin hüceyrələrin geri qayıtmasının qarşısını alan yeni peyvəndi sınaqdan keçirirlər. BioNTech tərəfindən hazırlanmış və BNT116 adlanan bu peyvənd ağciyər xərçənginin ən çox yayılmış növü olan kiçik hüceyrəli olmayan ağciyər xərçənginin (KHDAK) müalicəsi üçün nəzərdə tutulub.
Qeyd edək ki, peyvəndin artıq 7 ölkədə sınaqları başlayıb. NT116-nın ilk insan sınağı olan 1-ci faza klinik tədqiqatı Böyük Britaniya, ABŞ, Almaniya, Macarıstan, Polşa, İspaniya və Türkiyədəki 34 tədqiqat mərkəzində başladılmışdır. İngiltərədəki altı mərkəzdə həyata keçirilən bu araşdırmada, keçən çərşənbə axşamı ilk xəstə peyvəndi aldı.
Ümumilikdə təxminən 130 xəstənin immunoterapiya ilə birlikdə bu peyvəndi alması planlaşdırılır. Bu xəstələrə cərrahiyyə və ya radioterapiyadan əvvəl erkən mərhələdə xərçəng xəstələri, həmçinin inkişaf etmiş və təkrarlanan xərçəng hadisələri daxildir. Böyük Britaniyadan təxminən 20 xəstənin iştirakı gözlənilir.
