1 noyabrda Cənubi Koreya Prezidenti Li Çje Myon nüvə silahına malik qonşu Şimali Koreya ilə danışıqların bərpası üçün Çin Prezidenti Si Cinpindən yardım istəyib.
QafqazTürk Media Reutersə istinadən xəbər verir ki, Si Cinpin bildirib ki, əməkdaşlığı genişləndirməyə və qarşılarında duran çətinliklərin öhdəsindən birgə gəlməyə hazırdır.
Li, Si Cinpini Asiya-Sakit okean liderlərinin forumundan sonra Cənubi Koreyanın Gyonju şəhərində keçirilən dövlət sammitinə və şam yeməyinə ev sahibliyi edib. Bu, son 11 ildə Si Cinpinin ABŞ-ın müttəfiqi olan Cənubi Koreyaya ilk səfəri olub.
Cənubi Koreya prezident administrasiyasının məlumatına görə, Si Cinpin sammitdən öncə bildirib ki, Pekin Seulla münasibətlərə böyük önəm verir və Cənubi Koreyanı “ayrılmaz tərəfdaş” hesab edir.
İyun ayında növbədənkənar seçkilərdə prezident seçilən Li söz verib ki, ABŞ-la münasibətləri gücləndirəcək, lakin eyni zamanda Çinlə qarşıdurmadan qaçmağa və Şimali Koreya ilə gərginliyi azaltmağa çalışacaq.
Buna baxmayaraq, 1 noyabrda yayılan bəyanatda Şimali Koreya nüvə silahsızlanma proqramını “yerinə yetirilməsi mümkün olmayan arzu” adlandıraraq rədd edib.
Şimali Koreya dəfələrlə Li-nin təkliflərini rədd edib və bəyan edib ki, heç vaxt Cənubi Koreya ilə danışıqlar aparmayacaq. Son illərdə Pxenyan Seulla birləşmə siyasətindən imtina edib və Cənubi Koreyanı “əsas düşmən” adlandırıb.
Şimali Koreya lideri Kim Çen In bəyan edib ki, Vaşinqton nüvə silahsızlanma tələbindən imtina edəcəyi halda ABŞ-la danışmağa hazırdır. Lakin ABŞ Prezidenti Donald Tramp bu həftənin əvvəlində Cənubi Koreyaya səfəri zamanı danışıqlar təklif etdikdə, Pxenyan açıq şəkildə cavab verməyib.
Tramp və Li Cənubi Koreyadan milyardlarla dollarlıq investisiya qarşılığında ABŞ-ın tarifləri azaltması ilə bağlı danışıqlarda gözlənilməz irəliləyiş əldə etdiklərini bildiriblər. Bunun ardınca Tramp Asiya-Sakit okean İqtisadi Əməkdaşlıq Təşkilatının (APEC) liderlərinin əsas sammiti başlamazdan əvvəl ölkəni tərk edib.
Cənubi Koreyanın milli təhlükəsizlik məsələləri üzrə müşaviri Vi Sunqlak brifinqdə bildirib ki, Çin Koreya yarımadasında sülh və sabitlik naminə əməkdaşlığa hazır olduğunu ifadə edib.
Çinin dövlət mediasının məlumatına görə, Si Cinpinin Li ilə görüşü barədə xəbərlərdə Şimali Koreya ilə danışıqlardan ümumiyyətlə bəhs edilməyib.
Si Cinpinin səfəri zamanı Çin və Cənubi Koreya arasında yeddi saziş imzalanıb.
Cənubi Koreya ABŞ-ın hərbi müttəfiqi və əsas ticarət tərəfdaşıdır, lakin eyni zamanda Çinlə ticarətdən də ciddi şəkildə asılıdır.
Xatırladaq ki, 1 noyabrda Seulda yüzlərlə insan Si Cinpinin və Li-nin görüşü zamanı Çin əleyhinə aksiyada iştirak edib
