Bu gün 22 oktyabr tarixində Tbilisidə, Opera və Balet Teatrında 5-ci İpək Yolu Forumu işə başladı. Forum, Gürcüstanın Baş naziri İrakli Kobaxidzenin himayəsi altında, 22-23 oktyabr tarixlərində keçirilir və yüksək səviyyəli siyasi şəxslər, biznes sektoru və beynəlxalq təşkilatların nümayəndələri iştirak edir.
Açılış paneli – region ölkələrinin hökumət rəhbərlərinin yüksək səviyyəli dialoqu – Gürcüstan Baş naziri İrakli Kobaxidze, Ermənistanın Baş naziri Nikol Paşinyan və Azərbaycanın Baş naziri Əli Əsədovun iştirakı ilə keçirilib.
Forumla bağlı rəsmi məlumatda bildirilir ki, tədbir bu il də ənənəvi olaraq təmsilçilik və sektoral müxtəliflik baxımından zəngin olacaq və qlobal liderləri bir araya gətirəcək – 70-dən çox ölkədən 2300-dən artıq nümayəndə qatılacaq. Forum iştirakçıları arasında region ölkələrinin baş nazirləri və vitse-prezidentləri, region xaricindən sahə nazirləri, aparıcı qlobal şirkətlər və beynəlxalq səviyyəli ekspertlər, Gürcüstanda akkreditə olunmuş diplomatik korpus və BMT, Dünya Bankı, Asiya İnkişaf Bankı, Qara Dəniz İqtisadi Əməkdaşlıq Təşkilatı (BSEC) və digər beynəlxalq təşkilatların nümayəndələri iştirak edirlər.
“Tbilisi İpək Yolu Forumu” Asiya və Avropa arasında siyasi, ticarət-iqtisadi və mədəni əlaqələrin dərinləşdirilməsi üçün ən yaxşı imkanlardan və mühüm müzakirə platformalarından biridir. Forum çərçivəsində beynəlxalq ticarət-iqtisadi münasibətlər, Avropa və Asiya arasında nəqliyyat-logistika əlaqələri, o cümlədən Mərkəzi Dəhliz marşrutunun rolu və gələcək inkişaf perspektivləri, həmçinin müxtəlif sektoral istiqamətlər üzrə yeni proqram və layihələr müzakirə olunur. “Tbilisi İpək Yolu Forumu ”nun bu ilki əsas mövzusu və şüarı belədir: Bağlantıya sərmayə qoyun – Sabitlikdə inkişaf edin.
22 oktyabrda forum çərçivəsində beynəlxalq ticarət, Mərkəzi Dəhliz, energetika, investisiyalar, innovasiya və texnologiyalar mövzusunda yeddi panel müzakirəsi keçiriləcək. Əsas panellərlə yanaşı, paralel tədbirlər və müzakirələrdə regional infrastruktur layihələrinə diqqət yetiriləcək, o cümlədən Anaklia dərin dəniz limanı və Qara dəniz sualtı kabellər layihələri (energetika və rəqəmsal sahələr üzrə) gündəmdə olacaq. 23 oktyabrda isə forum çərçivəsində Tbilisi Maliyyə Sammiti təşkil olunacaq. İki gün ərzində forum çərçivəsində ikitərəfli biznes görüşləri və müxtəlif sahə şirkətlərinin nümayəndələri arasında digər paralel tədbirlər də keçiriləcək.
Qeyd edək ki, “Tbilisi İpək Yolu Forumu” 2015-ci ildən başlayaraq hər iki ildən bir təşkil olunur. Bu müddət ərzində forum beynəlxalq brendə çevrilmiş və müxtəlif ölkələrin hökumətləri arasında dialoq üçün yüksək səviyyəli platforma, həmçinin təşkilatlar və biznes nümayəndələri arasında ikitərəfli görüşlərin keçirilməsi üçün əsas məkana çevrilmişdir.
