1918 – 1920-ci illərin qaranlıq səhifələrini bir eşq hekayəsi, bir eşq dastanı işıqlandıra bilərdi. Belə də olub. Qurban Səid azərbaycanlı oğlu Əli ilə gürcü qızı Ninonun çox təsirli eşq hekayətini özünün eyniadlı romanında təsvir edib.
Gürcü heykəltəraş Tamara Kvesitadze 2010-cu ildə həmin əsər əsasında bir bənzərsiz sevgi abidəsi yaratmışdır və həmin abidə indi Batumi şəhərinin bir eşq simvoluna, saf məhəbbət təcəssümünə çevrilmişdir. “Əli və Nino” romanı da, onun əsasında yaradılmış məşhur “Sevgi Abidəsi” də həm azərbaycan, həm də gürcü xalqlarının mənəvi sərvətidir!
Xalqlarımız arasındakı əbədi dostluğun təminatçısı, etibarnaməsi və etimadnaməsidir! Sevgi – öncə, ən səmimi dostluqdur! Sevgi – kasıb könlündə belə, ulduzların sayrışmasıdır! İndi Batumi göylərində saysız-hesabsız, torpağında isə iki ulduz sayrışır! Lakin torpaqdakı bu iki ulduz göylərdəki saysız-hesabsız ulduzlarla yarışmaq iqtidarındadır! Çünki bu ulduzlar heç zaman sönmür!
