Gürcüstanın baş naziri İrakli Kobaxidze Macarıstanın paytaxtı Budapeştdə keçirilən Avropa Siyasi İttifaqının Sammitində iştirak edir.
QafqazTürk Media xəbər verir ki, Sammitdə iştirak edən 40-a yaxın dövlətin liderlərinə Macarıstanın baş naziri Viktor Orban ev sahibliyi edəcək.
Hökumət administrasiyasının verdiyi məlumata görə, Gürcüstanın baş naziri sammitin əhəmiyyətini vurğulayıb və qeyd edib ki, tədbir zamanı həm çıxış edərkən, həm də Avropa liderləri ilə Gürcüstanda gedən proseslər və Gürcüstan-Avropa İttifaqı münasibətləri barədə danışacaq.
“Xüsusilə maraqlıdır ki, bu tədbir ABŞ-da prezident seçkilərindən sonra Macarıstanın paytaxtı Budapeştdə keçirilir. Tematik paneldə, eləcə də ölkəmizlə bağlı mesajların və ölkəmiz ətrafında cərəyan edən hadisələrin dinləniləcəyi yekun plenar iclasda çıxış edəcəyəm. Həmçinin bizim Avropa liderləri ilə Gürcüstan-Aİ münasibətləri baxımından maraqlı olan bütün mövzularda danışmaq imkanımız olacaq. Onların arasında Gürcüstanın xarici siyasət prioriteti olan Avropa İttifaqına inteqrasiyadan bəhs edəcəyik. Biz Gürcüstandakı hazırkı proseslərdən, Gürcüstanla Avropa İttifaqının münasibətlərindən danışacağıq”, – deyə İrakli Kobaxidze bildirib.
Avropa siyasi birliyinin beşinci sammitində müzakirə olunacaq əsas mövzu Avropa təhlükəsizliyinin çağırışlarıdır. Sammit çərçivəsində tematik müzakirələrin aparılması planlaşdırılır. Baş nazir İrakli Kobaxidze əsas mövzusu iqtisadi təhlükəsizlik və bağlılıq olan panel müzakirəsində, həmçinin sammitin yekun plenar iclasında çıxış edəcək.
Gürcüstan hökumətinin başçısı xarici işlər naziri İlya Darçiaşvili və hökumət administrasiyasının rəhbəri Levan Jolianinin də daxil olduğu nümayəndə heyəti ilə birlikdə Avropa Siyasi İttifaqının Sammitində iştirak edir.
