Ermənistanın baş naziri Nikol Paşinyan “Bank of Georgia Group”un idarə heyətinin sədri Mel Karvil ilə görüşüb. Görüşün əsas müzakirə mövzusu Gürcüstan bankının Ermənistanın maliyyə bazarına daxil olması olub.
QafqazTürk Media xəbər verir ki, Paşinyan “Bank of Georgia Group PLC”nin Ermənistanda investisiya fəaliyyətinə başlamaq qərarını alqışlayıb.
Baş nazir bildirib ki, “Georgia Bank Group”un fəaliyyətə başlaması ölkənin maliyyə sektoruna yeni mədəniyyət gətirəcək və onun inkişafına töhfə verəcək.
Öz növbəsində Mel Karvil Ermənistanın maliyyə bazarının və bütövlükdə iqtisadiyyatının perspektivləri ilə bağlı optimist fikirləri bölüşüb. O, Ermənistanın pul-kredit siyasətinin balansını xüsusilə qeyd edib ki, bu da onun fikrincə, investisiya layihələrinin həyata keçirilməsi üçün əlverişli şərait yaradır.
İclasda “Bank of Georgia Group”un İdarə Heyətinin sədri Ermənistanda fəaliyyətin inkişafı planlarından da danışıb.
Hər iki tərəf Ermənistan hökumətinin korrupsiyaya qarşı mübarizəni davam etdirməsinin və ölkədə investisiya mühitinin daha da yaxşılaşdırılması üçün islahatların həyata keçirilməsinin vacibliyini vurğulayıb.
İqtisadçıların fikrincə, bu səfər və “Bank of Georgia Group”un Ermənistan bazarına daxil olması Ermənistanla Gürcüstan arasında maliyyə əlaqələrinin möhkəmləndirilməsində mühüm addım sayıla bilər.
Bundan əlavə məlumat var ki, “Bank of Georgia Group PLC” Ermənistanın aparıcı banklarından biri olan AmeriaBank-ı 303,6 milyon dollara alıb.
Aktivləri 1 trilyon AMD (2,5 milyard dollardan çox) olan AmeriaBank, öz brendini və korporativ kimliyini qoruyaraq, mövcud rəhbərliklə fəaliyyətini davam etdirəcək.
