Avropa Parlamentinin (AP) Brüssel və Strasburqdakı ofislərində hüquq-mühafizə orqanlarının əməkdaşları axtarışlar aparırlar.
QafqazTürk.com xəbər verir ki,bu barədə “Der Spiegel” xəbər verib.
Nəşrin məlumatına görə, reydlər Avropa Parlamentinə seçki ərəfəsində Rusiyanın təbliğat rupor kimi istifadə olunduğu iddia edilən “Voice of Europe” xəbər portalı ətrafında olan işlə bağlıdır.
“Der Spiegel”in müxbiri istintaq orqanları əməkdaşlarının Niderland Avropa Parlamenti üzvü Marsel de Qraafın Brüsseldəki ofisinə daxil olduğunun şahidi olub. Həmçinin de Qraafın köməkçisi Giyom P.-nin ofisində axtarışlar aparıldığı bildirilir.
Daha əvvəl Giyom P. Almaniyanın “Almaniya üçün Alternativ”in nümayəndəsi Maksimilian Kranın yanında işləyib, onun adı isə seçkiqabağı qalmaqalda hallanır. Bundan əlavə, “Der Spiegel”in iddiasına görə, bu əməkdaş Polşada Rusiya xeyrinə casusluqda şübhəli bilinən şəxsə parlament üzvlüyü vəsiqəsinin verilməsi işində rol oynayıb.
