ABŞ prezidenti Donald Tramp ölkəsinin dünən gecə İrana hücumla heç bir əlaqəsi olmadığını deyib və İrana xəbərdarlıq edib ki, onun ölkəsini münaqişəyə cəlb etməsin.
Tramp həmçinin bildirib ki, qanlı münaqişəyə son qoymaq üçün razılıq əldə oluna bilər.
“Birləşmiş Ştatların dünən gecə İrana hücum ilə heç bir əlaqəsi yox idi. Əgər İran bizə hər hansı bir şəkildə hücum edərsə, ABŞ ordusunun bütün gücü və qüdrəti indiyə qədər heç kimin görmədiyi kimi üzərinizə açılacaq. Bununla belə, biz İran və İsrail arasında asanlıqla razılaşma əldə edə və bu qanlı münaqişəyə son qoya bilərik!!!” – Tramp Truth Social-da yazıb.
ABŞ prezidenti Donald Tramp mart ayında İranın ali dini lideri Ayətullah Əli Xamneyiyə nüvə sazişi üzrə danışıqlar aparmaq üçün 60 gün vaxt verib və onların razılığa gələ bilməməsinin nəticələrinin olacağı barədə xəbərdarlıq edib.
