ABŞ prezidenti Donald Tramp ABŞ-ın bütün xarici yardım proqramlarını 90 gün müddətinə dayandıran sərəncam imzalayıb.
Əldə olan məlumata görə, bu müddət ərzində proqramların ABŞ-ın xarici siyasətinə uyğun olub-olmadığını müəyyən etmək üçün onların nəzərdən keçirilməsi və qiymətləndirilməsi planlaşdırılır.
“ABŞ-ın xarici yardım sənayesi və bürokratiyası Amerikanın maraqları ilə uzlaşmır və çox vaxt Amerika dəyərlərinə ziddir.
Onlar həm ölkə daxilində, həm də ölkələr arasında ahəngdar və sabit münasibətlərə bilavasitə qarşı olan ideyaları xarici ölkələrdə yaymaqla dünya sülhünün pozulmasına xidmət edir. Birləşmiş Ştatlar prezidentinin xarici siyasətinə tam uyğun gəlməyən heç bir ABŞ xarici yardımı göstərilməməlidir. Proqramın effektivliyini və Birləşmiş Ştatların xarici siyasətinə uyğunluğu qiymətləndirmək üçün Birləşmiş Ştatların xarici inkişaf yardımını 90 gün müddətinə dayandırın”, – sərəncamda deyilir.
