Reklam mesajları artıq əvvəlcədən razılıq olmadan göndərilməyəcək.
QafqazTürk.com xəbər verir ki, bu barədə “Transparency İnternational – Georgia” (TI) məlumat yayıb.
Məlumata əsasən bu, fərdi məlumatların mühafizəsi haqqında yeni qanunun nəzərdə tutduğu yeniliklərdən biridir.
Şəxs istənilən halda reklam mesajlarının alınmasına razılıq verməkdən imtina edə bilər. Sorğunu aldıqdan sonra 7 iş günü ərzində məlumat emalçısı şəxsin məlumatlarının işlənməsini dayandırmağa borclu olacaq. Qanundakı bu yenilik 2024-cü il martın 1-dən qüvvəyə minəcək.
Yeni qanuna əsasən, 2024-cü il iyunun 1-dən hər hansı dövlət qurumu, eləcə də bəzi özəl şirkətlər şəxsi məlumatların mühafizəsi üzrə məsul şəxsə malik olmağa məcbur olacaq.
Bu cür şirkətlərə sığorta təşkilatı, kommersiya bankı, mikromaliyyə təşkilatı, kredit bürosu, hava yolu şirkəti, hava limanı, ildə ən azı 10 min məlumat subyektinə xidmət göstərən tibb müəssisəsi daxildir.
Qanun, həmçinin ictimai və ya şəxsi yerlərdə səs yazısının (audiomonitorinqin) aparılması qaydalarını və şərtlərini müəyyən edir, ictimai və ya şəxsi məkanlarda yerləşən videokameralar (video monitorinq) vasitəsilə çəkilişin aparılması qaydalarını müəyyən edir, məlumatların təhlükəsizliyinin pozulması halları, yetkinlik yaşına çatmayanların şəxsi məlumatlarının qorunması üçün hüquqi təminatları müəyyən edir, bu barədə müfəttişi xəbərdar etmək öhdəliyini müəyyən edir və məlumatların işlənməsinin əsaslarını və məlumatları emal edilən şəxsin hüquqlarını artırır.
