2025-ci il üçün Avropa İttifaqının (Aİ) Genişlənmə Paketi noyabrın 4-də açıqlanacaq. Genişlənmə üzrə Avropa komissarı Marta Kos bu paketi Avropa Parlamentinin Xarici Əlaqələr Komitəsinin üzvlərinə təqdim edəcək.
Avropa Parlamentinin məlumatına görə, namizəd və potensial namizəd ölkələrin Aİ-yə üzvlük yolunda əldə etdikləri irəliləyişlər qiymətləndiriləcək və mövzu ilə bağlı müzakirələr aparılacaq. Komissiya bu ölkələrdəki islahatları nəzərdən keçirdikdən sonra komitənin məruzəçiləri hər bir ölkə üzrə Parlamentin nəticə və tövsiyələrini əks etdirən qətnamə layihələri hazırlayacaqlar.
Gürcüstandakı Aİ səfiri Pavel Herçinski bir neçə gün əvvəl bildirib ki, hesabat çox əsaslı sənəd olacaq və burada son bir ildə Gürcüstanda baş verənlər və bu prosesin Gürcüstanın Aİ-yə üzv olmaq istəyi ilə əlaqəsi ətraflı təsvir olunacaq. Hesabatın təqdimatı Brüsseldə Avropa Komissiyasının vitse-prezidenti Kaia Kallas və Genişlənmə üzrə komissarı Marta Kosun iştirakı ilə keçiriləcək konfrans çərçivəsində olacaq.
