Azərbaycanın milli informasiya agentliyi olan Azərbaycan Dövlət İnformasiya Agentliyinin (AZƏRTAC) 105 yaşı tamam oldu.
Gürcüstan Azərbaycanlıları Konqresi və Qafqaz TürkMedia ailəsi olaraq, həm öz adımdan, həm də rəhbərlik etdiyim kollektiv adından AZƏRTAC ailəsini səmimi qəlbdən təbrik edir, yaradıcı heyətə yeni-yeni, təzətər yaradıcılıq uğurları diləyirəm!
Azərbaycanla ölkəmiz Gürcüstan arasında qonşuluq və dostluq əlaqələrini yüksək səviyyədə işıqlandırmaq yönündə AZƏRTAC-ın verdiyi töhfələr çox dəyərlidir.
Buna görə də mən həm də ayrıca AZƏRTAC-ın Gürcüstan təmsilçiliyini, onun peşəkar jurnalisti Xətai Əzizovu ürəkdən təbrik edirəm!
Xətai müəllim Azərbaycanda gedən ictimai-siyasi prosesləri Gürcüstan əhalisinə və oxucularına, həm də əksinə, Gürcüstanda baş verən hadisələri də Azərbaycan oxucularına vaxtında və operativ şəkildə çatdıran dəyərli və peşəkar jurnalistdir. AZƏRTAC-ı bizə bu qədər sevdirən də məhz odur!
Şərəfli bir yol keçən, xəbər mübadiləsi sahəsində daim yüksək peşəkarlıq nümayiş etdirən AZƏRTAC beynəlxalq aləmdə Azərbaycanın güclü səsidir. Qoy bu səs daha ucalardan gəlsin!
Həmişə yeniliklərə açıq olan, inkişaf və irəliləyiş yolunu seçən AZƏRTAC-ın 105 illik yubileyi münasibətilə əməkdaşlarını bir daha təbrik edir, hər birinə yeni yaradıcılıq uğurları arzulayıram!
Hüseyn Yusubov
Gürcüstan Azərbaycanlıları Konqresinin sədri
