Gürcüstan Prokurorluğu Bolnisi bələdiyyəsində baş vermiş yol-nəqliyyat hadisəsi nəticəsində iki yeniyetmənin ölümünə görə bir nəfərə qarşı ittiham irəli sürüb.
QafqazTürk Media xəbər verir ki, bu barədə prokurorluğun mətbuat xidməti məlumat yayıb.
Əldə olan məlumata görə, Daxili İşlər Nazirliyi tərəfindən aparılan araşdırmalarla müəyyən edilib ki, təqsirləndirilən şəxs 2024-cü il dekabrın 30-da Bolnisi Bələdiyyəsi ərazisində avtomobili idarə edərkən ehtiyatsızlıq edib, nəqliyyat vasitəsinin təhlükəsizliyini təmin etməyib və nəticədə iki yeniyetmə ilə toqquşub. Prokurorluğun məlumatına görə, zərərçəkənlər aldıqları xəsarətlər nəticəsində yerindəcə keçiniblər.
“Hüquq-mühafizə orqanlarının əməkdaşları təqsirləndirilən şəxsi elə həmin gün həbs ediblər. O, Gürcüstan Cinayət Məcəlləsinin 276-cı maddəsinin 8-ci (avtomobilin təhlükəsizliyi və ya istismarı qaydalarını pozma, iki nəfərin ölümünə səbəb olduqda) ilə ittiham olunub. Prokurorluğun vəsatəti əsasında məhkəmə təqsirləndirilən şəxs barəsində həbs qətimkan tədbiri seçib. İstintaq davam edir”- Prokurorluğun yaydığı məlumatda deyilir.
Məlumat üçün bildirək ki, dekabrın 30-da Marneuli-Bolnisi mərkəzi magistral yolunda iki yeniyetmənin ölümü ilə nəticələnən yol-nəqliyyat hadisəsi baş verib. Daha sonra yerli əhali hadisə yerinə toplaşıb və vəziyyət gərginləşib.
Bununla bağlı Daxili İşlər Nazirliyi məlumat yayıb.
Daxili İşlər Nazirliyinin məlumatına görə, hadisə yerinə toplaşan vətəndaşlarla hüquq-mühafizə orqanlarının əməkdaşları arasında qarşıdurma yaranıb. Toplanan insanlar sürücünün avtomobilini, həmçinin təcili tibbi yardım briqadasının avtomobilini aşırıblar.
Agentliyin məlumatına görə, Daxili İşlər Nazirliyinin müxtəlif bölmələrinin nümayəndələri, o cümlədən patrul, kriminal və xüsusi təyinatlı idarələrin əməkdaşları hadisə yerinə gəliblər.
