Moldova parlamenti Rusiya qazının ehtimal olunan kəsilməsi ilə əlaqədar 60 günlük fövqəladə vəziyyətin tətbiqini dəstəkləyib.
QafqazTürk Media xəbər verir ki, bu barədə Euroactive məlumat yayıb.
Nəşrin verdiyi məlumata görə, ölkədə fövqəladə vəziyyət dekabrın 16-dan tətbiq olunacaq.
101 yerlik parlamentin 56 üzvü baş nazir Dorin Reçanın fövqəladə vəziyyət tətbiq etmək tələbini dəstəkləyib. Qərarın məqsədi Moldovanın Dnestryanı bölgəsinə təbii qazın verilməsini təmin etməkdir. Fövqəladə vəziyyətin elan edilməsi hökumətə tez reaksiya verməyə və enerji ixracını məhdudlaşdırmağa imkan verir.
Moldova baş nazirinin sözlərinə görə, səsvermə Moskvanın “qaz şantajına” son qoymaq üçün zəruri addım idi.
“Vladimir Putin Dnestryanı əhalisini qazsız və işıqsız qoymaq, onları girov götürmək istəyir. Moskva bunu Moldovada sabitliyi pozmaq üçün edir. Qoy bu qış ölkə tarixində enerji şantajına məruz qala biləcəyimiz sonuncu qış olsun”, – Dorin Reça deyib.
Moldova, dekabrın 31-də başa çatan Qazprom ilə qaz tranziti müqaviləsini uzatmayacağını açıqlayan Ukrayna vasitəsilə Rusiya təbii qazını alır. Moldova Rusiyadan ildə təxminən 2 milyard kubmetr qaz alır. 2022-ci ildən Dnestryanı və ölkənin mərkəzi hökuməti Moldovanın aldığı bütün Rusiya qazının Dnestryanıya göndərilməsi ilə bağlı razılığa gəlib.
Dorin Reçanın sözlərinə görə, Ukrayna ərazisindən tranzit məsələsi süni problemdir, çünki Rusiya qazı başqa marşrutlarla da çatdırıla bilər. Bununla belə, tədarük sual altında ola bilər, çünki “Qazprom” alternativ marşrutlarla qaz nəqlinin davam etdirilməsini Moldovanın köhnə borcunu ödəmək öhdəliyi ilə əlaqələndirib, Rusiyanın hesablamalarına görə, bu borc 709 milyon dollar təşkil edir.
