“Polis haqqında” qanunda dəyişikliklər: Nazir müsabiqəsiz işə qəbul edə biləcək
Daxili işlər nazirinə polisdə işləmək üçün şəxsləri xüsusi müsabiqədən keçmədən işə qəbul etmək və bu qaydaları öz əmri ilə müəyyənləşdirmək səlahiyyəti veriləcək.
Bu, parlamentə təqdim edilmiş “Polis haqqında” qanuna dəyişikliklər layihəsində nəzərdə tutulur.
Qeyd edək ki, bu layihə pirotexnikanın idxalı və satışı ilə bağlı tənzimləmələri əhatə edən qanunvericilik dəyişiklikləri paketinin bir hissəsi kimi təqdim edilib.
Hazırda qüvvədə olan “Polis haqqında” qanuna əsasən, polisə işə qəbul yalnız xüsusi müsabiqədən keçməklə mümkündür. Lakin yeni qanun layihəsində göstərilir ki, polisə işə qəbul prinsipi olaraq xüsusi müsabiqədən keçməyi tələb etsə də, lakin müəyyən hallarda xüsusi müsabiqədən kənar qəbul qaydaları və şərtləri nazirin əmri ilə müəyyən edilə bilər.
Layihədə qeyd olunur ki, qanun 2025-ci il yanvarın 1-dən qüvvəyə minəcək.
Qanun layihəsinin izahında bildirilib:
“2025-ci il yanvarın 1-dən hərbi xidmət yalnız Müdafiə Nazirliyində mövcud olacaq. Bu səbəbdən, yarımhərbi bölmələrin fəaliyyətinin spesifikasını nəzərə alaraq, polisə işə qəbul qaydalarının modifikasiyası zəruridir. Polis sistemində mövcud olan vəzifələrə onların spesifikasına uyğun olaraq fərqli qəbul qaydalarının tətbiqi tələb olunur”.
Layihənin müəllifləri və təşəbbüskarları “Gürcü Arzusu” partiyasının nümayəndələridir: Rati İonatamişvili, Aleksandr Tabatadze, Tengiz Şarmanaşvili, Nino Tsilosani, Aluda Guduşauri, İrakli Şatakişvili və Quram Maçaraşvili.
