Şimali Koreya səfiri Şimali Koreya əsgərlərinin Rusiyada olması ilə bağlı xəbərlər fonunda Avstriya Xarici İşlər Nazirliyinə çağırılıb.2
QafqazTürk Media xəbər verir ki, bu barədə Avstriya Xarici İşlər Nazirliyi məlumat yayıb.
Nazirliyin məlumatına görə, səfir Rusiyada Şimali Koreya silahlarının və qoşunlarının olması ilə bağlı yayılan məlumatla bağlı “ciddi narahatlığını ifadə etmək” üçün çağırılıb.
“Ukraynaya qarşı müharibəyə bu hərbi dəstək beynəlxalq hüququn açıq şəkildə pozulmasıdır və Avropa və Koreya yarımadasında təhlükəsizliyə xələl gətirir”, – bəyanatda deyilir.
Şimali Koreya qoşunlarının Rusiyanın Ukraynaya qarşı müharibəsində iştirakı ilə bağlı məlumatların yayılması fonunda Almaniya Xarici İşlər Nazirliyi Şimali Koreya işləri üzrə müvəqqəti nümayəndəni də çağırıb.
Dünən NATO Şimali Koreya əsgərlərinin Rusiyada olduğunu təsdiqləyib.
“Müttəfiqlər Şimali Koreya qoşunlarının Rusiyada yerləşdirilməsini təsdiqləyiblər. Əgər bu əsgərlər Ukraynada döyüşməli olacaqlarsa, bu, Şimali Koreyanın Rusiyanın qeyri-qanuni müharibəsinə dəstəyinin əhəmiyyətli dərəcədə artması və Rusiyanın cəbhə xəttində əhəmiyyətli itkilərinin daha bir əlaməti olacaq”, – deyə NATO sözçüsü Fara Dahlala bildirib.
