Ermənistanın Təhsil Nazirliyi Rusiya Xarici İşlər Nazirliyinin tənqidindən sonra Rusiyanın Ermənistanı ilhaq etməsi qeydini tarix dərsliklərindən çıxaracağını açıqlayıb.
QafqazTürk Media xəbər verir ki, Ermənistanın açıqlaması avqustun 15-də səkkizinci sinif tarix dərsliyində “Rusiyanın Şərqi Ermənistanı zorla ilhaqı” adlı fəsillə bağlı Rusiya Xarici İşlər Nazirliyinin tənqidindən sonra verilib.
Tarix kitabının onlayn versiyasına Rusiya Xarici İşlər Nazirliyinin postu əlavə edilib, burada qeyd olunan fəsil qırmızı rənglə “yalan” kimi yazılıb.
Rusiya fəslin məzmununun şübhə doğurduğunu, başlığının təxribat xarakterli olduğunu və Cənubi Qafqazın 18-19-cu əsrlər tarixini təhrif etdiyini bildirib.
Onların fikrincə, Rusiyanın Ermənistanı ilhaq etməsi “erməni dövlətçiliyinin gələcək bərpası üçün böyük əhəmiyyət kəsb edirdi” və Türkmənçay atəşkəslərini “ilhaq” adlandırması “hər hansı bir tarixçi üçün şokdur”.
Xatırladırıq ki, atəşkəsə əsasən, 1829-cu ildə Qacar sülaləsinin ali İran dövləti Şərqi Ermənistanı Rusiya imperiyasına verdi.
“Rusiya imperiyasının xüsusi rolunu, daha sonra isə bugünkü Ermənistanın formalaşmasında SSRİ və Rusiyanın rolunu şübhə altına almaq bu ölkənin təkzibolunmaz faktları təhrif etməsi deməkdir”, – Rusiya tərəfi bildirib.
Rusiya Xarici İşlər Nazirliyi Qərbin günahını tarixin “yenidən yazılmasında” görür.
“Söhbət ümumi tariximizi yenidən yazmaq üçün növbəti həyasız cəhddən gedir. Qərbin təbliğatı və siyasi texnologiyası nəticəsində ağa qara ad verilir və bunu xüsusilə xalqın rəğbətini qazanmağa can atan ermənilərin əli ilə edilir”.
Ertəsi gün tənqidlərə Ermənistan Təhsil Nazirliyindən cavab bəyanatı gəldi. Bəyanatda qeyd olunub ki, tarixin sözügedən fəslini nəzərdən keçirəcəklər və başlıqdan “ilhaq” sözünü çıxaracaqlar.
“Biz narahatlığı ehtiva edən siqnallar aldıq və bundan sonra kitabın müəllifinin komandası ilə birlikdə dəyişiklik edildi”, – brifinq zamanı nazirliyin Xalq Təhsili Departamentinin rəhbəri Tamara Sarkisyan bildirib.
Qeyd edək ki, bu, tarix kitabının mübahisələrə səbəb olduğu ilk hadisə deyil; Yanvarda Ermənistanın baş naziri Nikol Paşinyan məktəb tarix kitabının adının dəyişdirilməsi və onun erməni tarixi deyil, Ermənistanın tarixi adlandırılması təşəbbüsü ilə çıxış etmişdi.
O zaman Paşinyan Ermənistanın tarixinin “vətənsizlik və dövlətçilik epizodlarından” ibarət olduğunu iddia edirdi.
