2025-ci ildən Gürcüstanda baş nazirin, prezidentin və bütün nazirlərin maaşları artacaq.
QafqazTürk.com xəbər verir ki, hakim “Gürcü Arzusu” partiyası artıq parlamentə düzəlişlər layihəsi təqdim edib.
Baş nazir İrakli Kobaxidze bildirib ki, bu, korrupsiyanın ən yüksək səviyyədə qarşısını almaq üçün profilaktik olaraq vacib məsələdir.
Ən yüksək əmsal prezident və baş nazir üçün ildə 160 min lari (təxminən 60 min dollar) olaraq müəyyən edilir. Prezidentin maaşı iki dəfədən çox artacaq, baxmayaraq ki, bu, hazırki prezident Salome Zurabişviliyə təsir etməyəcək – qərar seçkilərdən sonra qüvvəyə minəcək. Onun ötən il bütün maaşı 84 min 221 lari olub.
Baş nazirin maaşı isə 73% artacaq. Nazirlərin maaşları orta hesabla iki dəfə artaraq təxminən 136 min lari olacaq. Bundan əvvəl deputatların, spikerin və növbəti çağırış parlamentdəki deputatların maaşları artıq köklü şəkildə artırılmışdı.
Müqayisə üçün Gürcüstanda orta aylıq əməkhaqqı təxminən 1700-1800 lari, yeni ildən pensiyalar isə 315-415 lari arasındadır.
