Bu ilin 9 ayında Gürcüstanda 52 nəfər öldürülüb. Bundan başqa, yeni doğulmuş körpənin ana tərəfindən qəsdən öldürülməsi ilə əlaqədar 5 fakt qeydə alınıb.
QafqazTürk.com xəbər verir ki, bu barədə Daxili İşlər Nazirliyi məlumat yayıb.
Statistik məlumatlara əsasən, 2023-cü il yanvarın 1-dən sentyabrın 30-dək ölkə ərazisində qəsdən adamöldürmə ilə əlaqədar 27, ağırlaşdırıcı hallarda isə 25 qəsdən adamöldürmə faktı qeydə alınıb. Onlardan 47-sinin üstü açılıb.
Bununla yanaşı, Daxili İşlər Nazirliyinin məlumatına görə, əvvəlki ilin müvafiq dövrü ilə müqayisədə qəsdən adamöldürmə cinayətləri 8, az ağırlaşdırıcı şəraitdə qəsdən adamöldürmələrin sayı isə 4 vahid artıb.
Sənədə əsasən, cari ilin 9 ayında yeni doğulmuş körpənin ana tərəfindən qəsdən öldürülməsi ilə əlaqədar 5 fakt qeydə alınıb. Ötən il sözügedən cinayətlə bağlı 3 fakt qeydə alınmışdı.
Həmin dövrdə adam öldürməyə cəhdlə əlaqədar 44, ağırlaşdırıcı hallarda isə 36 adam öldürməyə cəhd faktı açılıb.
Bundan başqa, 982 intihar, 141 ehtiyatsızlıqdan adam öldürmə faktı qeydə alınıb.
