Şimali Koreya lideri Kim Çen In silahlı qüvvələrin yüksək rütbəli generalını dəyişib və ordunu müharibəyə daha hazırlıqlı olmağa, silah istehsalını artırmağa və təlimləri genişləndirməyə çağırıb.
Qafqaztürk.com xəbər verir ki, KCNA dövlət xəbər agentliyinin məlumatına görə, Kim Çen In bu barədə düşmənin qarşısını almaq üçün lazımi tədbirlərin həyata keçirilməsi planlarının müzakirə olunduğu Mərkəzi Hərbi Komissiyanın iclasında bildirib.
Eyni zamanda, Kim Çen Inın qərarı ilə ölkənin yüksək səviyyəli generalı, Baş Qərargah rəisi Park Su-il tutduğu vəzifədən azad edilib və yerinə əvvəllər ölkənin müdafiəsini həyata keçirmiş general Ri Yonq-gil təyin edilib.
KCNA-nın məlumatına görə, Kim Çen Inın məqsədi silah istehsal imkanlarını artırmaqdır. Keçən həftə o, silah zavodlarına baş çəkib və raket mühərrikləri, artilleriya və digər silahların istehsalını artırmağa çağırıb.
Bundan əlavə, Şimali Koreya lideri silahlı qüvvələrin döyüşə hazır olması üçün hərbçiləri ölkədə istehsal olunan ən son silah və texnika ilə təlimlər keçirməyə çağırıb.