Qazaxıstan və Azərbaycan neftin Bakı-Supsa kəməri ilə nəqli imkanlarını müzakirə edirlər.
Qafqaztürk.com Trend agentliyinə istinadən xəbər verir ki, bu barədə Qazaxıstanın energetika naziri Almasada Satkaliyev hökumətin iclasından sonra jurnalistlərə bildirib.
“Biz artıq Qazaxıstan neftinin Bakı-Tbilisi-Ceyhan kəməri ilə ixracına dair razılığa gəlmişik və bu dəfə Bakı-Supsa kəməri ilə tədarükün başlanması imkanları nəzərdən keçirilir”, – nazir bildirib.
Onun sözlərinə görə, bu tədarüklərin hər ikisi Qazaxıstan neftinin tranziti ilə bağlı əvvəllər imzalanmış sazişlərə uyğun olaraq həyata keçirilir.
Bundan əvvəl Azərbaycanın energetika naziri Pərviz Şahbazov ilin sonuna kimi Bakı-Tbilisi-Ceyhan kəməri ilə 1,125 milyon ton Qazaxıstan neftinin nəql olunacağını açıqlamışdı. O cümlədən, Şahbazovun sözlərinə görə, “Azərbaycan hər ay Qazaxıstan nefti ilə yüklənmiş 12-14 tanker qəbul edir”.
“Tərəflər arasında imzalanmış ilkin saziş bu il 1,5 milyon ton neftin nəqlini nəzərdə tuturdu. Lakin tədarükün bu ilin aprelində başladığını nəzərə alsaq, ilin sonuna kimi 1,125 milyon ton neft nəql edə biləcəyik”, – deyə Şahbazov bildirib.
Bundan əlavə, Qazaxıstanın milli şirkəti olan “Kazmunaigaz” hesabat dərc edir, bu hesabata əsasən, bu ilin yanvar-iyun aylarında neft nəqlinin həcmi 5,8% artaraq 39,3 milyon ton təşkil edib. Şirkətin məlumatına görə, magistral boru kəmərləri ilə neft nəqlinin həcmi 4,9% artaraq 34 milyon ton təşkil edib. Şirkət Samar və Xəzər Boru Kəməri Konsorsiumunun istiqamətlərini əhatə edən artımı şərtləndirən əsas amil kimi “Kaztransoil” sistemi vasitəsilə Kaşaqan və Tengiz yataqlarından neft nəqlinin həcminin artırılmasını, eləcə də Azərbaycan Respublikasına nəqlini göstərir.
Dənizlə neft nəqlinin ümumi həcmi 12 faiz artaraq 5,2 milyon tona çatıb. Hesabat dövründə əsas artım amili Xəzər Boru Kəməri Konsorsiumundan Qara dəniz vasitəsilə Rumıniyanın Port Midiyasına neft nəqlinin bərpasıdır.
Qeyd edək ki, bu ilin birinci yarısında “Kazmunayqaz” tərəfindən neft və qaz kondensatının hasilatı 11,7 milyon tona çatıb ki, bu da ötən ilin müvafiq dövrünün göstəricisindən 10,1 faiz çoxdur.